انڈرسٹینڈنگ اسلام کا پس منظر

"انڈرسٹینڈنگ اسلام" ویب سائیٹ کا آغاز معز امجد صاحب نے اکتوبر 1997میں کیا۔ اس کا پس منظر یہ ہے کہ جنوری 1997 میں استاذ محترم نے جب انٹرنیٹ کا استعمال شروع کیا تو ان کی ذیادہ دلچسپی عالمی مذاہب اور بالخصوص اسلامی ویب سائیٹس پڑھنے میں رہی، اور اس طرح اسلامی، عیسائی، یہودی اور ہندومت کی سائیٹس کا مطالعہ ان کا روز کا معمول بن گیا۔ ان سائیٹس کے مطالعہ سے انھیں احساس ہوا کہ وہ خود بھی اس میدان میں اپنی علمی خدمات پیش کر کے دین کی خدمت کر سکتے اور بالخصوص غیر مسلموں کی طرف سے قرآن پر کیے گئے بنیادی اعتراضات کا جواب دے سکتے ہیں۔ چنانچہ انھوں نے جون 1997 میں ویب سائیٹ بنانے اور اسے انٹرنیٹ پر مہیا کرنے کے طریقوں کے بارے میں معلومات جمع کرنا شروع کر دیں اور تین ماہ کے قلیل عرصہ میں نہ صرف اس ٹیکنالوجی میں مہارت حاصل کر لی، بلکہ خود ہی ایک ویب سائیٹ بنانے میں بھی کامیاب ہو گئے۔ اور اس طرح اکتوبر 1997 میںBrainNet ISP کے ذریعے سے "انڈرسٹینڈنگ اسلام" کے نام سے اس ویب سائیٹ کو منظر عام پر لے آئے۔ کچھ ہی عرصے میں انھیں سوال موصول ہونا شروع ہو گئے اور سائیٹ روز بروز مقبول ہوتی گئ۔ اسی دوران میں انھوں نے مستشرقین کی طرف سے قرآن پر اٹھائے گئے اعتراضات کے جواب دئیے جنھیں علمی حلقوں میں بہت سراہا گیا۔

 جب کوئی شخص سچی لگن اور خلوص نیت سے کسی نیک کام کا آغاز کرے تو خدا کی توفیق اور نصرت بھی شامل حال ہو جاتی ہے۔ چند نیک لوگ معز صاحب کے اس سفر میں شریک ہوئے اور ان کی سائیٹ کو فنی طور پر مستحکم کیا، یہاں تک کہ سائیٹ بین الاقوامی معیار کے تمام تقاضے پورے کرنے لگی، اس کے قارئبن اور ممبران میں تیزی سے اضافہ ہونے لگا اور بہت سی دوسری تعلیمی و دعوتی ویب سائیٹس نے اس کا لنک اپنے صفحات پر دے دیا۔

 اسی دوران جنوری 2002 میں مجھے معز صاحب کے ساتھ کام کرنے کا شرف حاصل ہوا۔ میں نے سائیٹ کی ٹیکنالوجی میں چند فنی نقائص کی وجہ سے اسے ازسرنو نئی ٹیکنالوجی میں بنانے کا فیصلہ کیا۔ اس پراجیکٹ میں ہمارے سافٹ وئیر انجینئر مدثر نعیم میاں بھی شامل ہو گئے اور دو ماہ میں ہم نے نئ سائیٹ لانچ کر دی۔ اس سے فارغ ہوتے ہی معز صاحب نے مجھے اپنے علمی معاون Academics Assistant کے طور پر منتخب کر لیا اور مجھے اپنی فکر کو سمجھنے اور سائیٹ پر جواب دینے کی ذمہ داری سونپی۔ سائیٹ کی بڑھتی ہوئی مقبولیت کے سبب مختلف ممالک میں مقیم اردو قارئین اور بالخصوص پاکستانی قارئین کی طرف سے یہ تقاضا سامنے ‍آنے لگا کہ انڈرسٹینڈنگ اسلام کو اردو زبان میں بھی ہونا چاہئیے تاکہ اردودان طبقہ بھی اس سے استفادہ کر سکے۔ لہ‍ذا نومبر 2002 میں معز صاحب نے مجھے اس پراجیکٹ کا انچارج بنایا اور ساتھ ہی اس سائیٹ پر سوالوں کے جواب دینے کی ذمہ داری بھی سونپ دی۔

اردو ٹیکنالوجی میں فنی نقائص کی وجہ سے اس سائیٹ کی ڈویلپمنٹ انگریزی سائیٹ کی نسبت  زیادہ مشکل تھی۔ لیکن خدا کا بہت احسان ہے کہ اس نے تمام مشکلات کو آسان کیا اور اس سائیٹ میں کم و بیش ان تمام سہولتوں کو مہیا کرنے میں ہماری مدد کی جو انگریزی سائیٹ میں موجود ہیں۔

اللہ تعالی ہمیں حق بات کو خلوص نیت سے سمجھنے، سمجھانے اور اس پر عمل کرنے کی توفیق عطا فرمائے اور ہماری لغزشوں اور کوتاہیوں کے شر سے ہمیں اور دوسروں کو ہمیشہ محفوظ رکھے۔ آمین

امیرعبدالباسط
ایڈیٹر